विद्येश्वर शिवमन्दिर महेश संन्यास आश्रम एवम् महेश संस्कृत गुरुकुलको परिसरमा अवस्थित छ । यस मन्दिरको निर्माण ब्रह्मलीन परमपूज्य गुरुवर श्री १००८ डा. स्वामी रामानन्द गिरिजी महाराजको शुभ संकल्पअनुसार धर्मानुरागी भक्तहरूको स्वैच्छिक दान सहयोगबाट वि.सं २०६३ सालमा सम्पन्न भएको हो । विशुद्ध नेपाली प्यागोडा शैलीमा निर्मित यस मन्दिरको डिजाइन प्रसिद्ध इन्जिनियर शङ्करनाथ रिमालले गर्नुभएको हो । यस मन्दिरको विधिवत् प्राणप्रतिष्ठा एवम् उद्धाटन वि.सं. २०६३ साल श्रीपञ्चमीका दिन निरञ्जनपीठाधीश्वर आचार्य महामण्डलेश्वर अनन्तश्रीविभूषित स्वामी पुण्यानन्द गिरिजीमहाराजले गर्नुभएको हो । यस मन्दिरमा शिवपाञ्चायन पूजा पद्धतिअनुसार ११ जना ब्राह्मणहरूद्वारा नित्य रुद्राभिषेक एवम् पूजा-आरती गरिन्छ । यस मन्दिरभित्र बीचमा नर्मदेश्वर शिवलिङ्ग, आग्नेय कोणमा सूर्य, नैर्ऋत्यमा गणेश, वायव्य कोणमा देवी र ईशान कोणमा विष्णु भगवान्‌का विग्रहरू प्रतिष्ठापित छन्, साथै पश्चिम दिशामा शिववाहन नन्दी रहेका छन् । 

                   मन्दिरको बाहिरी परसरमा दक्षिणमा कीर्तिमुख भैरव र हनुमान् , पश्चिममा नन्दी, उत्तरमा त्रिशूलास्त्र, ईशानमा चण्डेश्वर  र पूर्वमा भगवती सरस्वती एवम् आद्य जगद्‌गुरु शङ्कराचार्यका विग्रहहरू रहेका छन् । अाग्नेय कोणमा नित्यहवनका लागि कलात्मक शैलीमा हवन कुण्डको निर्माण गरिएको छ । मन्दिरको प्रतिष्ठादिवस श्रीपञ्चमी, महाशिवरात्री एवम् अन्य पर्वहरूमा विशेष पूजा र आराधना गरिन्छ ।
विद्येश्वर शिवमन्दिरको दैनिकी

प्रातःकालीन

ढोका खुल्ने  ४:३० बजे
रुद्राभिषेक  ५:०० बजे
आरती  ५:४५ बजे
भोग  ९:३० बजे
ढोका बन्द   १०:०० बजे

सायंकालीन

ढोका खुल्ने  ५:०० बजे
पूजा  ५:१५ बजे
आरती  ६:०० बजे
नैवेद्य वितरण  ६:३० बजे
शयन  ७:३० बजे

नोटः  मन्दिरको समयसारिणी ऋतुअनुसार परिवर्तन हुन्छ ।